第65屆體育節開鑼 玩盡有益身心活動

做運動有益心身，黛安聽公關姊妹講，港協暨奧委會主辦、獲康文署資助嘅「第65屆體育節」已開鑼，今個月仲聯同多個體育總會舉辦唔同免費活動和試玩，剛剛過去嘅周末就有「賽艇夏日祭」，天氣咁好，大家都玩得好盡興。

姊妹話，今個星期六、日第二個重頭戲活動係「第四屆香港賽車運動節」，喺數碼港商場舉行，不但展出多架久經沙場嘅賽車和器材，畀一眾車迷打卡外，仲設有「電競賽車體驗」和「電競表演賽賽事直播」畀大家免費試玩。

今個月28日亦會喺鑽石山荷里活廣場舉行「體操同樂日」，想參加就要預先喺明日（16日）經體育節網站報名，當日可以喺教練指導下，一試彈網、藝術體操和健美體操，名額先到先得，快啲去報名啦！姊妹透露當日大會仲請咗吳翹充、黃曉盈等港隊體操代表到場，同市民一齊睇香港體操運動員嘅精采示範㖭。