奧比斯40歲中秋義賣 皇玥售慈善月餅

買月餅都可以做善事！黛安知道，奧比斯迎來40周年，將再與卡通人物「癲噹」合作，聯同奇華餅家贊助嘅月餅，推出一系列限定禮品，包括聯同本地精品咖啡品牌18 Grams及sensory ZERO推出兩款限量版中秋套裝，糅合傳統和現代口味，可細味月餅、咖啡與養生茶嘅獨特配搭。

今年奧比斯仲首度推行「月餅捐贈計劃」，與香港盲人輔導會、聖巴拿巴會之家及匡智會合作，8月8日起大家可透過奧比斯中秋義賣網站www.orbis.org/hkmooncake，為上述慈善機構送出愛心月餅，將節日祝福帶入社區。

另外，皇玥集團今年亦首度與慈善機構仁愛堂合作，推出特別版「皇玥‧仁愛堂低糖雙色月餅」（低糖芝麻及低糖烏龍月餅4件裝），喺皇玥全綫分店及仁愛堂20個服務單位銷售，慈善價每盒售$248，下周一（25日）起發售。今次中秋月餅義賣活動，部分收益將撥捐仁愛堂，以支持佢哋各項服務，令更多有需要人士獲得支援。