恒生「夠薑蔥5星星學院」 為DSE考生打氣

為咗同DSE考生打氣，黛安收到風，恒生銀行旗下社交平台「夠薑蔥」特別透過The Sandbox推出「夠薑蔥5星星學院」，畀考生放榜前率先喺元宇宙嘅虛擬學院摘取5星星，參加者只需完成任務，集齊共40顆星星即有機會換取飲品券，先到先得。

「夠薑蔥」仲會同foodpanda合作，送出總值$10萬優惠券，推廣活動將於本月18日起，不時出現喺「夠薑蔥」ig嘅限時動態，追蹤專頁嘅粉絲可享$20送餐優惠。

另外，佢哋仲邀請咗網紅及女子組合Lolly Talk成員Elka Cheng（鄭芷淇），為DSE考生錄製名為《衝の伴》打氣音樂短片，下月8號喺「夠薑蔥」社交平台發布，一齊鼓勵年輕人發揮潛力，以積極嘅態度克服障礙。