新世界「餐餐送愛」捐款助基層 為期兩月220食肆響應

疫下基層市民嘅生計飽受衝擊，黛安聽公關姊妹講，新世界發展策動嘅大型捐贈配對平台「Share for Good愛互送」，今日起推出為期2個月嘅「Share a Meal餐餐送愛」計劃，更獲餐飲業界支持，有近220間食肆參與，捐助者只需用手機掃描食肆展示嘅「餐餐送愛」二維碼，或登入「愛互送」網站，就可以透過AlipayHK或PayMe捐出$10或以上，捐款滿$100可申請免稅收據，而平台合作夥伴仁濟醫院就會將捐款用作代購物資，特別係米、罐頭、包裝麵等，按需要分配畀60間受惠機構，再轉贈基層。

響應嘅食肆不乏米芝蓮星級食府，好似ZEST by Konishi、Beefbar、夜上海等；仲有香港瑰麗酒店、君悅酒店、香港萬麗海景酒店等裏面嘅多間食肆；另外，連鎖餐飲品牌、新世界旗下商場餐廳等都攜手送愛。