91歲黃夏蕙宣布移民網民不捨 黃大仙上頭炷香生鬼造型成絕響

近年香港出現「移民潮」，圈中有唔少藝人都選擇離開香港發展。91歲嘅黃夏蕙今日（6.10）都話離港生活，今早佢喺自己社交平台出post表達心情，唔少網民都表示好唔捨得佢，同時希望佢去到第二個地方生活會開心。

同場加映：人間飄浮丨黃劍文一步之念 險隨母親做傻事 學懂珍惜：愛真係要講出口 

{{hket:ul-video id="5897"}}{{/hket:ul-video}}

夏蕙姨上載出同經理人Simon嘅合照，先係多謝對方幫助自己，令佢事業重生：「十年人事幾番新！唔經唔覺，同我經理人小肥豬Simon，一齊共同努力咗十年，佢見證住我人生最低潮嗰一刻，亦喺我最低潮同黑暗嘅年代，幫我重新包裝象，由D&G事件開始，叫我關心社會事情，教我用搞笑嘅手法，與民同樂。呢段時間，雖然艱辛，不過真係好開心！」

{{hket:inline-image name="206019233_5822350027807539_105732032355300542_n.jpg"}}{{/hket:inline-image}}

之後，夏蕙姨就表示將會移民：「無奈，我懷着好唔捨得嘅心情！我要同大家講一句，8月我要走啦！我唔知幾時可以再喺香港同大家見面！我唔知大家會唔會掛住我！此時此刻，我只會同大家講，我無論身處世界某一個角落，我都會好掛住大家！今個月12號星期日，將會係我同經理人最後一次訪問錄影，我會好懷念呢一刻！直到永遠。再次多謝大家，有缘再會！」

唔少網民都留言表示不捨，但都祝福佢去到新地方會過得順遂：「祝願夏蕙BB身體健康、生活愉快、一切順利！梗係掛住你啦」、「繼續喺FB關注你，祝你喺新嘅地方生活愉快」、「夏蕙姨，多謝你為香港及香港人帶來歡樂！保重」。此外又有人留言「新年無咗你頭炷香標誌」，睇嚟大家都覺得好可惜，以後農曆新年會冇咗夏蕙姨去黃大仙爭上頭柱香，事關佢每年都會悉心打扮一番，睇夏蕙姨有咩新花臣成為咗香港人年初一期待嘅節目之一。

圖片來源：Facebook

撰文：黃蘊姿