Pet Pet星丨吳家樂為子女領養唐狗BB 身教對動物有愛及尊重生命

吳家樂為了培養3個子女的愛心和責任心，2017年在保護遺棄動物協會領養一隻唐狗BB，取名為Trico，今年已經5歲幾，吳家樂一家視Trico為家中的一分子。
由於太太周蕙蕙是SAA保護遺棄動物協會創會會員，一直致力幫助拯救流浪動物，加上兩夫婦對動物十分寵愛，因而感染了小朋友，一直都嚷著想養狗狗。吳家樂最令人敬佩的地方，就是他說過不論是甚麼品種和甚麼年紀的動物，大家都要懂得尊重生命。

同場加映：人間飄浮丨黃劍文一步之念 險隨母親做傻事 學懂珍惜：愛真係要講出口

{{hket:ul-video id="5897"}}{{/hket:ul-video}}

{{hket:inline-image name="80511141_456196975266584_3564921374096783828_n.jpg"}}{{/hket:inline-image}}

吳家樂日前接受《晴報》電話訪問，他表示：「我同太太有個共識，喺小朋友10歲前唔可以養寵物，因為小朋友嗰陣時仲細，佢哋都仲需要我哋去照顧嘅時候，咁即係等於係我哋去照顧隻狗，我哋照顧梗係冇所謂啦，但唔係嗰回事囉。到咗大女10歲，我應承咗佢哋就唔可以反口覆舌，所以我就同保護遺棄動物協會傾，我話小朋友想養狗，協會話每一隻狗嘅脾氣同個性都唔同，如果小朋友想養，最好領養狗BB，同小朋友一齊成長會比較好，當然我哋成年人領養成年狗，梗係冇問題啦！」

《Think Big》黐身老竇︳吳家樂跟實三子女喜好搵話題 女要錫仔要嚴教：流血都唔准喊【下一頁】

隔了一段時間，吳家樂就收到協會的來電，指有隻流浪的唐狗BB，問他們有沒有興趣領養，吳家樂馬上攜同三個子女去看看，首先觀察一下狗BB和小朋友的反應和互動，去了兩次，他們已經十分掛住這隻狗BB，最後決定領養牠回家。

回想Trico第一日返到屋企，吳家樂指牠很不習慣，需要時間適應，他說：「Trico緊張咗兩、三個星期，佢對人、車都好緊張，偏向細膽，初時唔太肯食嘢，成日會匿埋，不過佢又冇攻擊性嘅。Trico開頭喺我同太太間房，慢慢佢就覺得呢間房係佢嘅地盤，唔畀我啲小朋友入房，會兇佢哋，於是我將Trico瞓覺嘅地方搬返出廳，等佢知道呢間屋係佢屋企。」他笑指Trico起初瞓籠、地氈，有時又會偷偷跳上床，而且是「宅男」一名，不愛出街，出街只是為了去厠所。Trico是家中的「小王子」，一家人都很愛牠，吳家樂笑說：「我啲仔女對我都冇咁溫柔，其實大家已經當咗Trico係 一家人，我收工就即刻返屋企，對佢好掛心。」他更將Trico的肖像印在頭盔、衣服上，足見他很愛Trico。

新冠肺炎│吳家樂無懼隔離只為一家五口團聚 罕曬三子女近照 網友：好似媽媽【下一頁】

{{hket:inline-image name="10.JPG"}}{{/hket:inline-image}}

隨著仔女長大，要到外國讀書，由於疫情關係，政府早前實施熔斷機制，令到子女們與Trico不能見面，小朋友相當掛念Trico，但只能靠視像與牠見面，吳家樂說：「好彩我嘅傭人姐姐好好，都好照顧Trico。」自從養了Trico後，3個子女增添一份責任心，吳家樂表示：「佢哋會知道自己要做啲乜嘢，要去放狗，幫Trico抹腳，落雨會幫Trico抹身，有一份『兄弟姊妹』嘅感情，我大女成日都同Trico攬頭攬頸，玩自拍。」

提到很多父母因為有了小朋友，會選擇棄養動物，吳家樂則以過來人身分指，其實小朋友和動物是可以一起生活的，「喺網上睇好多片，狗狗都可以照顧小朋友，其實係睇你點睇，一家人都可以有拗撬㗎，被遺棄嘅寵物，佢哋係知㗎，所以我哋要尊重生命，對寵物要有愛！」

撰文：黃曉妍

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】