香港仔社區藝術計劃 演繹漁港濃情

香港仔以前係四大漁村之一，如今城市景觀起咗唔少變化。公關姊妹同黛安講，南區龍舟競渡委員會喺6月至9月籌辦「漁港濃情‧香港仔」社區藝術計劃，計劃獲得社區更新基金資助，希望透過導賞及研習坊，令年輕人及大眾認識香港仔嘅漁港濃情。

研習坊初步分為6節，大部分喺周六舉行，由藝術導師帶領參加者對多項趣味性嘅題目進行討論，再以畫作或藝術方式演繹出嚟，作品仲有機會展示喺鴨脷洲龍舟存放處對外嘅地方㗎。即日起至6月5日可報名，費用全免，詳情可瀏覽「香港仔濃情」fb專頁。