感人風景綫

上星期的某天一早，好夢正濃，電話鈴聲大作，睡眼惺忪，爬起身拿起個聽筒，還未出聲，電話那頭已經傳來十分緊張的聲音︰「我同老公兩個都兩條綫呀，Marites都係呀！」

吓！我成個醒晒！原來老友記Betty一家兩口連菲傭都中了招！於是立即取來紙筆，對Betty說︰「你要買乜嘢我即刻記低，買咗攞過嚟！」

攞住張shopping list，先去藥房，門口有條不太長的人龍，只需排隊10分鐘就輪到我，不過，我想替Betty買的藥，排在前面的好幾個人都問過了，答案都是：「賣晒！無貨！」幸好還買到火酒、漂白水和消毒紙巾。接着去了幾間藥房，每一間執到一兩樣，都算沒有白走一趟，要嘅藥都買到！

掉頭去街市，心情好得多了！肉檔開番，豬肉牛肉都有，雖然貴了一些。蔬菜瓜果很新鮮，又有很多選擇，於是大買特買，相信夠Betty一家吃5、6日！

揪着幾大袋，去到Betty住的大廈，按電梯上樓，電梯門打開，嚇了一嚇，每戶的門口，都放了一張凳，其中兩張凳上，還放了幾個滿滿的超市袋！

這是疫情下一道人間溫暖的風景綫！有人染疫，親戚朋友都即時送上物資。

我也放下那幾袋食物在Betty門口的凳上，按一下門鈴，轉身入電梯下樓去。

（本欄逢周五刊登）