海洋公園「STEAM學生大賽」 結合網絡安全應對動物保育

今年學生要提早放暑假，黛安知道，海洋公園為咗鼓勵同學喺停課期間繼續學習，最近同網絡安全專家Fortinet攜手舉辦「海洋公園STEAM學生大賽2022」，賽事將結合動物保育同網絡安全，以「間諜奇兵-仿動物機械人」為主題，邀請全港中小學生提交解決各動物保育議題嘅建議。

今次比賽希望學生設計同製作一個配置收集環境資料裝置嘅仿動物機械人，仲要構思同設計一套安全網絡傳送資料系統。Fortinet就會同參加者分享網絡保安方案，等學生可應用合適嘅方案喺設計成品中。

入圍嘅隊伍，可以參加由教育大使同網絡安全專家帶領嘅專屬工作坊，得獎者更可參與學生作品展覽，與公眾同評審分享設計理念同實體化嘅成品㖭。