新世界 × 3香港捐5G數據卡 助基層對外聯繫

圍封強檢相信對香港人嚟講已經唔陌生，黛安就知道，新世界今個月初同3香港合作，將一批5G數據卡捐贈畀基層長者和學童，就算停課都不停學，長者仲可以keep住同外界聯繫，認真唔話得！

聽公關姊妹講，呢批數據卡捐贈畀香港基督教女青年會、香港社區組織協會、基督教香港信義會社會服務部、救世軍和聖雅各福群會，再由佢哋轉贈畀有需要人士，預計有2,500名基層長者同學童受惠。

姊妹仲話，中小學和幼稚園因應疫情而提早放暑假，數據卡正好畀佢哋可以喺屋企學習時，都有充足嘅數據和網絡。至於獨居長者，唔少礙於疫情嚴峻而唔敢外出，數據卡就可以等佢哋繼續同屋企人同社區聯繫。

救世軍社會服務部市場及業務發展經理何美儀都話，好多謝新世界捐贈數據卡，等獨居長者可以喺疫情下，透過視像同社工和家人見面，接收疫情資訊，中心亦提供網上復康運動班，就算長者唔外出，都可以喺屋企做簡單運動。