東鐵綫提升設施 改善通風照明美化牆身

港鐵東鐵綫過海段預計今年6至7月就會通車，黛安收到風，港鐵正推動其他方面嘅籌備工作，例如陸續美化同改善東鐵綫12個現有車站嘅月台面貌同設施，其中九龍塘站已展開工程，除咗馬場同紅磡站之外，其他車站嘅工程預計都會喺5月完成。

黛安聽講，各東鐵綫車站月台未來嘅牆身圖案會有全新設計，融入更多港鐵風格，好似經典嘅馬賽克紙皮石元素等，退休港鐵建築設計師區傑棠亦會揮毫書寫各站嘅站名；牆身設計仲會包括車站附近地標圖案同車站舊相，將來掃描牆上嘅二維碼，就可以了解更多相關嘅歷史喇。

港鐵仲會喺多個月台加裝冷風系統、改善埋啲照明等，相信可為乘客帶嚟新嘅乘車體驗，黛安都想去親身感受下。