新地無償借地 建臨時隔離設施 提供$1500萬物資助抗疫

愈來愈多人染疫，黛安睇新聞都知道，社區隔離及治療設施嚴重不足，最近幾個地產商都好有心，出錢又出力，同大家一齊抗疫。好似新鴻基地產發展有限公司（新地）日前就公布，會推出多項措施配合政府穩控疫情嘅工作，當中包括已物色兩幅共14公頃、基礎設施相對齊備嘅土地，無償借畀政府興建臨時隔離同治療設施。另外，新地正同政府商討，打算借出分別位於元朗、觀塘同北區，旗下3個寫字樓同商場設立社區疫苗接種中心，方便區內長者同小朋友去打針。

公關姊妹話，新地仲會提供超過1,500萬嘅物資支援前綫抗疫人員、基層社群同員工抗疫。當中包括40萬套快速抗原病毒測試包，其中10萬套會送畀喺抗疫前綫嘅清潔工，及住喺「三無」大廈嘅基層等，另外10萬套就提供畀香港警務處、20萬套就會派畀新地嘅員工。更會準備10,000份內含快速抗原測試包、口罩、消毒用品同日常物資嘅「新地愛心抗疫包」，一半送畀有迫切需要嘅人士，例如安老院舍、正在家居隔離嘅基層；另一半則送畀前綫醫護人員，希望可解燃眉之急。