7-11 × Sanrio推Hello Kitty布甸狗咕𠱸 一套3件可隨意配搭

今日係情人節，黛安知道，7-Eleven喺今個情人節，為大家帶嚟2款由Hello Kitty及孖生姊妹Mimmy White；仲有Pompompurin（布甸狗）及朋友Macaron組成嘅「Sanrio characters啪住上大頭咕𠱸」。Macaron更以攣毛造型登場，令咕𠱸更貼近角色特質，不但可愛仲軟綿綿，抱住佢真係好舒服。

公關姊妹話，咕𠱸一套3件，每件上下左右都有2粒啪鈕，可以隨意配搭。既可以將咕𠱸上下扣上變成長抱枕，又可將咕𠱸左右並排扣上，等Sanrio characters排排坐喺梳化陪你睇電視。咕𠱸仲可以分開3個獨立使用，喺小蝸居招待客人時，更可以拆開一人一個㖭。

今日早上7時起，只要喺7-Eleven分店消費，加$238就可以換購「Sanrio characters啪住上大頭咕𠱸」一套，而且可自選款式。數量有限，換完即止，想為家居擺設搞搞新意思，就要快啲去換購喇。