滙豐客戶派電子利市 500萬封金額逾億

今個農曆新年，唔知大家逗咗幾多利市？黛安聽聞，滙豐銀行客戶目前已透過PayMe同滙豐流動理財App，派送超過500萬封電子利市，加埋總值逾億港元！當中PayMe用戶就透過「群組利市」功能派咗超過7,000萬元利市，由年初一至初三期間已派咗大約150萬封利市；喺呢批利市當中，約一半係發送畀指定收款人，而且有4成屬於金額隨機嘅「開運利市」。

滙豐香港區財富管理及個人銀行業務主管伍楊玉如同黛安分享，佢話雖然今年過年繼續受到疫情限制，但大家仍可循環保方式向親友送上農曆新年祝福；佢自己就特別鍾意派「開運利市」，因其特性可為親友帶嚟更多樂趣同話題，令過年氣氛更熱鬧。

公關姊妹仲話，滙豐今年特別向發送群組利市嘅PayMe用戶送上$28獎賞，畀大家喺超過2萬間商戶使用，希望帶動大家繼續喺本地商戶消費。