一田至靚食材低至6折 情人節煮大餐之選

下星期一就係情人節，唔少情侶都會為另一半製造驚喜。黛安收到風，一田超市由即日起至下周二（15日），將以低至6折出售多款高質食物，方便大家為摯愛煮浪漫大餐。熱門食材如「美國極選安格斯心形牛扒」同「美國極選安格斯牛扒」，每100克特價只售$84，「澳洲冰鮮法式羊架」每100克特價售$39.8，蘇格蘭煙三文魚柳（200克）亦減至$159.9等，多款氣泡酒、香檳等亦會減價。

另外，一田亦會同ABC Cooking Studio合作推出情人節食譜教學，教大家烹出「和風吉列西冷牛扒」同「法式紙包白酒焗三文魚」。大家亦可預留5日時間預訂「山下菓子保鮮花水晶球蛋糕」，同伴侶一齊歎蛋糕之餘，又可收藏美麗嘅水晶球，一舉兩得；一田亦為大家準備咗9款Mintstyle DIY甜品套裝，新手都只需20分鐘就炮製「自家限定」甜品，畀情人一個驚喜。