信和3大商場聖誕人流升35% 顧客消費慾強

今年聖誕節周圍好熱鬧，黛安聽公關姊妹講，信和集團旗下3大商場：屯門市廣場、奧海城和荃新天地，喺聖誕周末假期短短3日嘅人流，按年升咗35%，吸引超過300萬人次入場！

姊妹話，唔少市民都趁年底去商場掃貨，搜羅禮物及添置新裝，加上今個月派咗最後一期消費券，令大家出外使錢更爽手，唔少精品、飾物和童裝店舖嘅生意，按年錄得25%增長；時裝、化粧品及影音電器嘅生意，亦升咗約20%；商場嘅餐飲生意更有70%嘅增長㖭。

信和集團資產管理董事蔡碧林同黛安講，今年聖誕節信和集團特別同迪士尼合作，喺旗下7大商場同利東街，打造「Disney Winter Celebration迪士尼閃亮冬季」活動，又推出多項節目，包括飄雪滙演和AR互動遊戲等，成功吸引顧客到場消費購物；又推出「愈買愈狂賞‧即抽即賞大抽獎」活動，送出熱搶音樂頒獎禮門票，令顧客消費意慾勁升。佢仲話，信和集團會繼續提升旗下商場嘅硬件同埋優化商戶組合，希望丁財兩旺！