海洋公園保育基金慈善賽 星級運動員保衞海洋

香港海洋公園保育基金噚日舉辦「慈善接力挑戰2021」，係水上樂園建成後首個公開體育活動。今次以「同心接力、保衞海洋」為主題，提醒大家全球正臨生態危機，如氣候變化、塑膠污染等，活動共籌得逾$120萬善款，將用作支持保育基金喺本地及亞洲嘅野生生態保育及有關教育項目，今次參加接力賽嘅隊伍仲星光熠熠㖭。

接力賽共分3部分，包括350米游泳、10公里單車以及3公里山跑，真係「三項鐵人賽」一樣，有70幾隊隊伍落場參與，其中明星隊由海洋公園主席劉鳴煒率領，星級運動員隊則由海洋保育大使郭晶晶率領，隊員包括本港泳隊代表江忞懿、「欄王」陳仲泓、同滑浪風帆代表陳晞文。

晶晶仲喺閉幕禮上分享其減塑心得，話環保習慣非一朝一夕，要每日注意自己日常生活有無造成污染同浪費，亦要以身作則教子女明白愛護環境重要性，日常生活減少使用塑膠。