「文」遊藝術聖誕 3大文具主題場景變打卡熱點

黛安讀書時都鍾意儲文具，公關姊妹話，最近迎海薈、逸峯廣場、翔龍灣廣場及港灣豪庭廣場聯手打造「文」遊藝術聖誕，即日起至明年1月2日，喺場內精選咗3款文具，包括筆、萬字夾及紙膠帶為主題，仲請來禪繞認證教師Cat Kwan合作設計出嶄新禪繞畫圖案，將各款文具融合聖誕色彩、圖案及禪繞畫變成3大場景，啱晒文青去打卡影相呀。

例如迎海薈設置咗3米高嘅巨型手搖鉛筆刨裝置，翔龍灣廣場亦會展出逾3.5米高嘅標籤機，港灣豪庭廣場則有個放大版萬字夾打卡位。活動期間喺上述商場，即日以電子貨幣消費滿$700或以上，仲可換領聖誕禮品，將繪有禪畫嘅小型文具收納盒帶返屋企。