最近人氣組合MIRROR和連鎖快餐店合作，粉絲食炸雞餐即送鏡仔閃卡，而ATV亞洲電視更食住熱潮推出男星限量版閃卡，頭兩彈的卡上分別印有8位前ATV藝人手執炸雞，擺出唔同poses，呢批男神卡背景用色同排字睇落都同MIRROR嘅炸雞閃卡好似！
同場加映：廣告酬勞飆升｜MIRROR成員傳出騷身價高達50萬 AK：希望報道講嘅係真
ATV為咗催谷手機App及串流平台年費會籍，日前推出呢套ATV男星閃卡，第一彈率先登場，有前ATV藝人秦沛、潘志文、劉永同羅樂林。閃卡在FB推出後，引起唔少網民關注，其中羅樂林更化身「LOKLAM」，與MIRROR隊長LOKMAN僅一字之差！而秦沛兒子姜文杰更在網上轉發相關閃卡，留言：「有無人可以話我知呢啲係咪真㗎？」
由於第一彈反應熱烈，引起唔少討論，無幾耐ATV就徇眾要求，乘勢推出第二彈及第三彈閃卡，有陳展鵬、林韋辰、鄭則仕、袁文傑、陳啟泰、尹天照、盧海鵬及劉錫賢。當中「煎pang」陳展鵬張卡個樣係來自亞視2003年劇集《暴風型警》的劇照，設計組將陳展鵬手上的槍換上炸雞，非常搞笑。昨日陳展鵬出席活動，受訪時直言不介意被「抽水」，「最重要大家開心，藝人工作就係想帶畀觀眾快樂。」他更指希望舊公司送套相給他，若然可以推出閃卡做慈善就更好。
(點擊放大睇圖片)
而ATV閃卡主角之一袁文傑接受本報訪問時表示自己唔明點解ATV會揀呢張相，笑言希望設計組換過另一張。「呢張相9萬幾人send畀我，我都唔明佢會揀呢張相。呢一張相係我1997年拍完古裝劇之後影，我好肯定。因為個時我髮線比較低，戴古裝頭套要剃額前頭髮，之後緊接拍時裝劇，頭髮未咁快生出嚟，所以望到好似好稀疏。我真係服得佢，好想問吓邊個同我咁過唔去，哈哈哈！我係亞視拍過唔少劇，影唔少相，揀任何一張都好過呢一張。」
他又指見到呢張卡唔係好驚嚇，但亦無諗住儲。他笑言：「我冇好驚嚇，因為我知自己有影過呢啲相，但係我唔明點解佢要拎呢一張，其實有好多可以用。我冇興趣儲，強烈要求佢換過另外一張相！」
另外，亞視發言人表示，感謝網民的支持，有關藝人相片均取自亞視擁有版權的劇照，未來亦會考慮按網民的意見推出不同的宣傳圖，並呼籲網民支持亞視手機程式及串流平台。
【亞視1999年月曆出土】袁文傑被封「不老男神」21年如一日 網民嘆「亞視味濃」：走在潮流側邊【下一頁】
U Lifestyle App自家節目登錄《U TV》專區！
↓↓試玩、試食、試用影片任你睇↓↓