「香港綠色建築周」 鼓勵市民投入減碳生活

愈來愈多人提倡綠色生活，黛安收到風，由建造業議會同香港綠色建築議會合辦嘅「香港綠色建築周2021」，將於今個月25日至10月1日舉行，透過唔同活動鼓勵大家投入減碳生活，當中嘅重點活動「綠建大步走」，更鼓勵大家去唔同地方參加導賞團同玩遊戲，最積極參與嘅「綠建步走員」更有機會贏走iPad㖭！

「綠建大步走」要求大家走勻環球貿易廣場、K11 MUSEA、九龍城一號污水泵房、如心廣場、南豐紗廠及西九文化區戲曲中心，並參加由「綠建專才」、歌手林家謙與電台主持阿正帶領嘅導賞活動，喺建築內同活動網站參加指定任務並賺積分。只要喺下月8日前達成指定目標，即有機會贏獎品，包括DJI Osmo Pocket三軸機械增穩雲台相機、天然藍牙無綫喇叭等，詳情可瀏覽香港綠色建築議會fb專頁。