迪士尼角色變身6微縮模型 海天晉滙&上水廣場有得睇

迪士尼粉絲注意！黛安打聽到，人見人愛嘅胡迪、巴斯光年、小熊維尼、米奇及米妮等塑像，今日（17日）起至10月10日將現身Ocean PopWalk海天晉滙；10月11日至11月14日，就會去到Landmark North上水廣場同大家見面。場內設有3個2米高嘅巨型故事書主題裝置，最啱打卡影靚相！

場內仲會展出6個1比64嘅《Miniature Journal》微縮模型，配上唔同主題場景及配件，每一款都精緻可愛，當中包括漫遊星際嘅三眼仔，睇住佢喺無邊際星空中遊蕩，驚喜處處；仲有沉醉喺糖果世界嘅米奇及小夥伴們；至於小熊維尼就同好友豬仔、跳跳虎喺森林開蜜糖派對；而一眾「反斗奇兵」亦會喺遊樂園中大玩特玩，粉絲見到一定好開心。

此外，場內更設有自助售賣機，除了發售第1及第2代嘅盲盒外；The Point by SHKP會員更可憑售賣機消費收據及指定積分，喺上述兩個商場換領限定嘅「夜光三眼仔」或「夜光巴斯光年」！