《全民造星IV》丨花姐笑言最愛睇女生撩是鬥非 望節目有《延禧攻略》宮鬥情節

ViuTV大型選秀節目《全民造星IV》，昨日已經公布96位入圍女參賽者，有潛質者將可獲選加入「女團」。今季除了有余香凝妹妹余潔滢、歐陽巧瑩妹妹歐陽巧霖，以及ERROR成員郭嘉駿（193）妹妹郭嘉盈入圍外，還有一些富有演藝經驗的參賽者︰例如27歲的《2019年度亞洲小姐競選香港賽區》冠軍羅思雅、26歲的羅洛家則是指揮家葉詠詩和退休警務處高級助理處長羅夢熊的女兒、24歲的趙展彤於2005年參加《殘酷一叮》及2009年《超級巨聲》 ；另外20歲的坂部佩莎（莎莎）曾經是家燕媽媽旗下少女組合Honey Bees成員之一，當年12歲的她有份演出劇集《老表，你好嘢！》，亦有網民覺得26歲的周芷慧（阿杰）的樣子，跟韓國女星朴信惠有點相似。

{{hket:inline-image name="17.JPG"}}{{/hket:inline-image}}

{{hket:inline-image name="16.JPG"}}{{/hket:inline-image}}

《全民造星IV》丨96位女參賽者強勢誕生 193余香凝妹妹成全場焦點【下一頁】

有人總會認為女仔多，是非一定多，一定很難湊，女團經理人戴穎（Wing）昨日與節目監製兼MIRROR、ERROR經理人花姐接受《晴報》訪問，Wing表示這是大眾的想法，「會幻想多女仔就一定多是非，有《延禧攻略》嘅情節……但喺我觀察到而家，因為時間真係好緊逼，每日都要訓練，又拍嘢……」花姐問她：「定係有，你睇唔到呀﹖」Wing說：「有機會係，但我見到佢哋個心好一致，因為大家都想做好。」花姐笑說：「我擔心我節目，竟然冇呢啲睇，我成日撩是鬥非，希望佢哋會有《延禧攻略》，但最後都冇。」

談及96位參賽者，花姐指她們有第一輯《全民造星》的影子，「我覺得佢哋質素唔好，但我又被佢哋感動到，睇到好熱血，好返咗第一輯《全民造星》咁，質素差唔多，（都係）咁差。不過佢哋有好心，好想入呢行，好享受呢個舞台，鬧佢哋10次、跳到喊都唔介意。」問到對哪位參賽者有深刻印象，花姐說：「我幾鍾意Marf（邱彥筒），質素唔錯，佢嗰日綵排好得人驚，到第二日改到好好，本身佢嘅潛力好大，唱歌又得，跳舞又得，個樣又有性格，身形又唔錯，所以我覺得佢幾好。」花姐又主動提及曾參加《全民造星III》的方芷欣（方方）和夏子涓，「上年都好好成績，唔知今年嚟參加做乜鬼？我有同子涓傾過，佢本來係女團（曾是女子組合Bingo成員），但佢唔想做，之後退團……我而家明明係選女團，佢又嚟參加？佢話上年參加完《全民造星III》，發覺自己好嚮往同人哋合作表演，佢想再有一次機會，子涓講完呢番說話，我覺得佢有實力。」

《全民造星IV》面試｜黃榕被花姐鬧喊再騎呢劈腿搶Fo 娛圈小強以陳冠希「女友」之名出位【下一頁】

問到將來選出的女團，會否跟MIRROR和ERROR合作？花姐笑說：「對襯家！」但Wing即落閘，希望花姐遠離她們，「我同啲女仔講，我哋要爭啲地位返嚟吖嘛！」花姐聞後拋下一句笑說：「一年後，我睇吓你係咪呢個樣！」

{{hket:inline-image name="895.JPG"}}{{/hket:inline-image}}

今年19歲的Marf（邱彥筒），現時是兼職舞蹈員、模特兒和獸醫護士，對於被花姐讚有進步，Marf說：「應該係因為第一次綵排，我喺項目入面，佢覺得我表現得未係最好，當時話咗我兩句，未去到鬧，暫時對我哋都算仁慈；自己喺一日內，盡能力去改善，可能兩日之間（綵排）見到個分別。」而羅思雅接受電話訪問表示：「當時參加亞姐都係貪玩，讀緊書想試吓新嘢，我本身鍾意唱歌，知《造星IV》係打造女團，可能我未必完全適合，希望節目可以有個舞台表演，表達我好鍾意唱歌同畀更多人認識。最終，其實我都想做個本地創作歌手，我一向有作曲作詞，不過未有機會公開同發表。其實好多參賽者都好叻，好多舞蹈員，亦有好多唱功好好嘅人，我自己鍾意唱歌多啲，跳舞方面真係努力學習緊。」「阿妹組」幾位參賽者先贏出知名度，但她坦言在合作過程中看出她們的努力，所以相信可以公平競爭。

撰文：黃曉妍

同場加映：《全民造星IV》丨96位女參賽者強勢誕生 193妹余香凝妹成焦點

{{hket:ul-video id="4054"}}{{/hket:ul-video}}

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】