曾志偉、王祖藍加盟無綫後，致力在綜藝及資訊娛樂節目上推行變革。而前者更表明今年的藝員訓練班將突破常規，指希望將訓練班變成好似《全民造星》嘅真人騷，「將學員變成演員嘅培訓過程呈現觀眾眼前！」
昨午無綫在電視城舉行《2021藝員及電視製作人員訓練班面試》，應徵者多達1,200人，當中年紀最小僅18歲。電視廣播有限公司副總經理（綜藝、音樂製作及節目）曾志偉、藝員訓練班校長馬浚偉、助理總經理（戲劇製作）曾勵珍、助理總經理（藝員管理及發展）樂易玲及首席創意官王祖藍等都有出席。
曾志偉指今年的藝員訓練班將參考ViuTV王牌節目《全民造星》，「今年喺特別嘅一年，喺祖藍嘅創意下，希望將訓練班變成真人騷，好似《全民造星》，將學員變成演員嘅培訓過程呈現觀眾眼前！唔一定揀靚仔靚女，睇我同祖藍身形都得，最重要對演藝有興趣、忠誠，熱愛演戲，鍾意呢份工！」他又提醒學員除了對自己有信心外，更要「學做戲前先學做人」，未知是否乘機暗諷ViuTV藝人193（郭嘉駿）早前的寸爆言論。而曾志偉在事後未有受訪已匆匆離去。
馬浚偉、王祖藍及樂易玲等在記者會後接受訪問，提到志偉表明藝訓班希望模仿ViuTV節目《全民造星》，祖藍指正在籌備中，「大家會有啲唔同，TVB訓練班歷史悠久，亦都係TVB獨有嘅文化。」而樂易玲表示去年已有將訓練班變成真人騷的計劃，「不過祖藍上年比較忙，佢今年返嚟就即刻同佢提議，同埋其實TVB造星已經造咗50幾年。」而身為藝訓班校長的馬浚偉說︰「今次藝訓班學員學到嘅嘢會比較全面，影視唔同方位都會有，課程有三個月理論及三個月實習，要虛心同唔可以遲到。」
（↓點擊圖片放大↓）
近日TVB與ViuTV展開電視大戰，樂易玲強調去年已有將訓練班變成真人騷的構思、計劃，有網友認為無綫參考友台成功的節目，肯改革是一件好事；然而亦有人狠批TVB缺乏創意，更指曾志偉曾嘲ViuTV收視得四點、題材偏門，只能與J2台比較，如今竟然照抄友台節目。
ViuTV真人騷節目《全民造星》第一輯於2018年播出，成功「造星」。當中16名參賽者組成男團的MIRROR及ERROR於近年爆紅，如姜濤、Ian（陳卓賢）等工作機會不斷。而節目監製花姐（黃慧君）成為組合的經理人，連帶她亦有接拍廣告的搵錢機會。
（↓點擊圖片放大↓）
《好聲好戲》｜劉江離巢一年重返TVB擔任評審 繼曾志偉加盟後 有邊10位藝人回歸？ 【下一頁】