迪士尼角色陶瓷碗 7-Eleven周三起有得換

公關姊妹同黛安報料，7-Eleven與迪士尼將推出由「米奇與好友」、「愛麗絲夢遊仙境」、「Dumbo小飛象」及「鋼牙與大鼻」為主題嘅4款限量版陶瓷碗連匙羹，仲用咗女仔至愛嘅糖果色系，睇見都好吸引。另外，趁住秋天就快到，7-Eleven亦特別推出「Chip 'n' Dale野餐墊」，9月1日起可換購喇！

試用過陶瓷碗嘅姊妹話，碗口夠大又有闊手柄，更可盛載攝氏0至100度嘅食物，而且可放入微波爐，方便翻熱各種美食或湯；另外，每隻匙羹除咗印有角色名字，底部亦使用凸綫設計，方便將匙羹平放喺桌面，設計夠細心。至於野餐墊更足夠4個人坐，並有加厚海綿隔層同防潑水設計，唔使怕地面有濕氣或倒瀉水，加上只重490克，帶出去野餐都好方便。

即日起至9月28日，只要喺7-Eleven分店購物滿20元即可獲1個印花，其後每10元可多1個印花。10月前用6張印花加56元，便可換1套「陶瓷碗連匙羹」，購物加188元即可換購野餐墊。