國泰夥拍OpenRice 飛行里數換美食

疫情下大家無得去旅行，儲埋咁多飛行里數無用武之地？黛安聽公關姊妹講，國泰最近同OpenRice「開飯喇」合作，只要係亞洲萬里通及馬可孛羅會香港會員，用已升級嘅國泰手機App，即可用里數、現金甚至「里數加現金」為餐飲埋單！

公關姊妹話，會員只要喺國泰App連結亞洲萬里通和OpenRice帳戶，以及綁定Mastercard或Visa信用卡，就可以喺夥伴餐廳用上述3種方式付款。以現金支付嘅部分，每消費$4就可以賺取1里數；若以渣打國泰Mastercard信用卡喺星期五、六、日簽帳，每消費$4更可以賺取達3里數㖭。

另外，首5萬名會員以「里數加現金」方式付款，可額外賺取200里數；使用OpenRice訂座指定餐廳並按時出席，亦可賺取25里數。由即日起至下月30日嘅推廣期內，亞洲萬里通及馬可孛羅會會員喺指定夥伴餐廳享用環球美食，仲可賺雙倍里數，優惠真係多到數唔晒，大家可上asiamiles.com睇埋其他優惠同指定餐廳啦！