入行10年發長文︱陳嘉倩被杜汶澤直斥「作狀女人」 練成強心臟：拉黑無上文下理負評

前無綫新聞主播陳嘉倩因為甜美靚樣被網民封為「嘉倩BB」，仲由主播轉型做全能型主持，東京奧運期間，同強尼、沈殷怡、馬啓仁（Keyman）等為ViuTV主持奧運直播節目《奧運有得揀》。不過嘉倩表現被網民批評唔夠專業，感覺似花瓶，閉幕禮當日，更因為同保錡＠ERROR同框嘅一幕，引起杜汶澤直斥「作狀女人」。

事緣KOL司徒夾帶cap低保錡為搶鏡同靠近嘉倩，留言：「彈開啦你！夠膽搶我陳小姐鏡，仲黐到咁埋，想死。」杜汶澤先cut走相中的陳嘉倩，只剩下保錡，並留言：「咁樣順眼好多」，更話保錡「至少無咁作狀」，仲指名道姓：「陳嘉倩真係香港電視史上最作狀嘅女人。」杜汶澤留言一出就有唔少網民Like爆，睇嚟嘉倩近年觀眾緣認真一般！

{{hket:inline-image name="228300199_379227050216467_6499825232361343350_n.jpg"}}{{/hket:inline-image}}

今日，嘉倩就趁自己入行10年發長文，似乎亦係為佢被指作狀反擊。佢先講到自己為演藝夢付出咗唔少：「我從小都有個夢想，就是做個大家喜歡的主持人。這個夢想從前來得較簡單直接，畢業後電台有offer做節目主持，到之後大家較熟悉的新聞主播，從一張白紙開始練習讀稿，咬字，留意時事，幾年間不間斷。後來因為喜歡嘗試新事物的性格，跳出來後有涉獵其他類型節目主持，那種節目形式和氣氛跟以前完全唔同，現在仍然在努力學習中，我相信離成功還有一段大距離，由衷感謝身邊一直支持和給予機會的人。」

嘉倩指自己多年嚟做幕前，已經學識咗過濾一啲評論：「做了幾年幕前，我也漸漸學識練成強大的心臟。自問係一個怕是非、怕煩的人，入行前面對批評八卦，自己不會說亦不想聽，我通常不會正面辯駁，可能會逃避，等gossip完雨過天青。但現在畢竟我要對觀眾負責，看到自己的新聞時，一些正面的留言我當然歡迎，但批評我的說話我更珍視。有建設性的意見我通常會反省，但路過無上文下理就一兩句負評我通常都會拉入黑名單，怕情緒被牽動，畢竟建立很困難，摧毀努力可以是一秒之間。有位前輩都同我講過，你做一件事，一百個人有一百個唔同嘅解讀，無可能討好所有人，做事最緊要過得到人過得到自己。人生已經很累，少為一些別人對你無緣故的恨費心。我想我還會繼續學習，好深刻奧運期間有位運動員講過，人生就算你用力完成一件事，結果可能都會未如理想，但起碼博盡無悔。不放棄我想也是贏的一種吧，致一直還在堅持的人。」最後佢喺hashtag指自己心態改變咗，雖然披上滄桑但慶幸初心還在。

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】