荃新天地變身非洲叢林 周末設環保工作坊綠色市集

暑期又有好去處！黛安收到風，Citywalk荃新天地下星期六（17日）起至8月29日，將舉行「Go Green！環保救地球」活動。期間商場將變成非洲叢林，設多個環保遊戲體驗、親子工作坊及綠色市集。小朋友喺活動期間可化身Eco-Rangers生態保育小先鋒，參與歷奇之旅，挑戰叢林飛索及唔同關卡，成功完成餵飼小象嘅任務，即可免費參與大象糞便記事本製作，過程好玩有趣，一定好難忘。

位於商場戶外花園廣場及中庭嘅「藝遊‧象之『森』玩樂區」入面，仲有一隻以環保物料、彩樂板製成嘅4米高巨型非洲森林象助陣，藉此宣揚保育非洲象嘅環境信息，公關姊妹話隻大象好靚㗎，大家記得去打卡，影番一輯唯美森林靚相喇。

另外，同場仲有非洲象展覽，以有趣、互動方式分享保育非洲象嘅小知識；每逢周末仲有綠色生活市集，16間環保小店會售賣小盆栽、天然食品、環保產品及有機護膚品等，千祈唔好錯過呀。