美麗華廣場周末市集 創遊多國主題攤檔

疫情爆發至今，大家已經好耐無得去旅行，公關姊妹話畀黛安知，尖沙咀美麗華廣場同LOCOLOCO合作，由今個月19日至7月4日，一連3個周末舉辦「創遊各國周末市集」，雲集唔同國家主題嘅攤檔，相信可以一解大家無得去旅行之苦！

市集每個星期會邀請30個手作或創意設計小店參加，例如以刺繡製作日本和風手鞠球嘅「Petite Garden」；由泰國進口手造紙花，自家創作唔同花藝擺設嘅「Sawadee.Fa」；仲有製作土耳其飾物嘅「Turkish Products & World Shop」；以及售賣伊朗傳統手造工藝嘅「Silkbond」。現場仲有好多特色品牌，想搜羅各國生活好物就千萬唔好錯過喇。黛安提提大家，第一次市集今個星期六（19日）會喺美麗華廣場B1中庭舉行，開放時間為中午12時至晚上8時。