海洋公園互動體驗館 虛擬學習之旅

互動式學習愈嚟愈流行。黛安打聽到，海洋公園威威天地將設全新多媒體互動體驗館「探索號R」，畀3至9歲小朋友透過有趣又刺激嘅互動虛擬遊戲，認識動物如何適應自然環境，由本月30日起，進入海洋公園後，額外加$120就可以登上「探索號R」喇。

黛安知道，小船員一進入體驗館就會被編配入自然守護隊，經3D技術掃描全身後，就會有1個同自己一樣嘅分身角色進入虛擬世界，系統仲可帶領用家自創專屬AI超級動物開展探索旅程，聽講AI超級動物可用唔同身體部件組裝，等小朋友可發揮無限創意。

小船員喺旅程中，可根據其AI超級動物喺模擬環境中嘅表現，探究各身體部件點樣幫助野生動物喺嚴峻嘅自然環境中生存，應用「思考、嘗試及修改」嘅思維技巧，一定可以獲益良多。

小船員完成歷程後如果唔捨得小動物，只要下載「探索號R」手機應用程式，就可以喺園外繼續培育及訓練自己嘅AI超級動物，當佢哋再次登上「探索號R」，就有機會見到小動物技能升級甚至進化，真係好有趣啊。