黃金海岸鳥類生態展 消費滿$600換領米埔遊

夏天周身郁怕熱？不如參加靜態啲嘅觀鳥！黛安收到風，香港黃金海岸由即日起至下星期四（27日），推出以雀鳥保育為題嘅「鳥」解自然企劃。除咗可以參觀商場嘅鳥類及生態藝術展覽，仲可以憑消費參加米埔生態遊，全面了解自然保育，最啱一家大細去參加。

黛安知道，今次展覽係由香港觀鳥會策劃，以上水塱原濕地同瀕危雀鳥禾花雀做主角，展出大量珍貴生態相片，可窺探禾花雀嘅瀕危檔案和遷徙習性。展覽仲搵咗4位本地藝術家，包括勞麗麗、黎慧儀、水熊阿蟲及鄧國騫，展出以香港農地生態為題材嘅藝術作品㖭。

此外，商場仲連同附近酒店、遊艇會，設置咗超過300隻紅鶴裝飾。加埋今個月正係繁花盛開嘅季節，雞蛋花散發淡淡清香、鳳凰木鮮艷奪目，黛安已約好姊妹去打卡。

想深入了解大自然，本月內喺場內消費滿$600即可換領獎賞，喺下個月12日參加世界自然基金會「米埔自然遊」生態導賞團。長2公里嘅路綫，穿梭基圍、魚塘、觀鳥屋及野生生物教育中心，更有機會近距離欣賞各種留鳥、候鳥同野生生物，真係機會難逢啊！