台灣古早味直送太古城誠品 重溫好時光

台灣人情味濃厚，旅行時不時聽到台灣人親切問候一句「呷飽沒？」（吃飽了沒？）令人暖在心頭。因為疫情關係，好多人暫時未能重遊舊地，不過，想重溫台灣好時光，不一定要踏上旅途，懷舊文青味十足嘅台灣車站，原來一早搬咗嚟誠品太古店。

誠品公關姊妹同黛安講，今次特登喺太古城中心二樓中庭同中橋，重現5大台風打卡位，包括鐵路站候車處、愛玉冰菓室、阿姨美髮院、淡水柑仔店同信義照相館，將50、60年代嘅台灣風貌搬到大家眼前。黛安最鍾意鐵路候車處嘅設計，唔單止涼亭、黃黑間燈柱、白欄柵等細節100%還原舊式車站場景，仲有「路邊攤」呢種夜市風擺設，打卡氣氛十足。

另外，即日起至下個月20日，誠品仲會喺古早市集引入過千件100%台灣直送原材食品同生活好物，保證大家一定可以「呷飽」同埋買到飽，送畀親朋好友，一齊分享台灣獨有嘅原味道。