太極樂隊鍵琴手唐奕聰（Gary Tong）於3月2日因心臟病發突然離世，終年57歲，家人今日為他在灣仔循道衞理聯合教會國際禮拜堂舉行安息禮拜，他的遺孀謝玉霞、家人、太極樂隊成員及圈中不少好友都有到場送別Gary最後一程。由於教會空間有限，太極樂隊特別安排現場直播，好讓世界各地的歌迷及朋友都能夠參與其中，太極的FB直播高峰期有超過1200人觀看。教堂的中央十字架下，掛上Gary的遺照，被家人的花圈包圍著，太極成員則奉上一個用白花和黃花砌成的太極符號花圈；而圈中人如郭富城、劉德華、黎明、陳慧琳、張智霖夫婦、鄭中基夫婦、譚詠麟等都有送上花圈致哀。
太極Gary Tong唐奕聰疑心臟病猝死終年57歲 曾跟張國榮合作無間【下一頁】
安息禮拜於下午2點半開始，許志安、鄭中基、張敬軒、朱茵及丈夫黃貫中、草蜢的蔡一傑、Mr.成員Tom、麥家瑜、姚瑩瑩、林保怡、音樂監製舒文、環球唱片高層黃劍濤等都有出席。靈柩由太極五位成員及家人扶進場，太極五子獻唱英文版《奇異恩典》，大會熒光幕播放住Gary昔日的生活片段和照片，回憶良多。
Gary的表弟、藝人李忠希的哥哥負責致辭懷念，他說：「Gary四兄弟姊妹排行最細，所以有個名叫『細個仔』，自細我都叫佢做『細個表哥』，直至後來有機會一齊工作先改口叫Gary。Gary比我大六年，佢好鍾意畫畫，佢喺畫簿畫出好多科幻同抽象作品，我當係公仔書咁睇......佢突然離世對我打擊好大，冇咗個指引人生嘅親人，音樂上少咗個同行者，傷感難以形容。」
（點擊放大睇圖片）
Gary Tong病逝│太極HI-FI德忍痛如期接受訪問 哽咽憶老友「回憶湧出嚟瞓唔到」【下一頁】
Gary的遺孀謝玉霞致辭分享他的生命點滴，她表示：「Gary因心臟突發3月2日離世，終年57歲。Gary除了畫畫同音樂之外，煮嘢食都有一手，佢亦遺傳到媽媽好客嘅性格，相信在座好多人都被佢請過食飯。佢有仁愛、喜樂、和平、忍耐、恩慈、良善、信實，唯一一樣係節制方面差少少。因為佢好鍾意食嘢，而且係工作狂，做起嘢嚟就狂做，所以搞壞咗身體。Gary小時候已經有心漏病，所以身體好孱弱......學過幾年鋼琴，不過佢就唔鍾意練琴，但就好熱愛音樂，而家相信佢回想起自己人生應該會好自豪，亦冇入錯行，做足40幾年。」Gary提到丈夫的愛錫時，一度悲從中來哽咽；後來強忍淚水，繼續講辭：「佢好錫我，好就我，亦好孝順老人家，我讀書返學，佢就照顧我媽媽，仲會推輪椅帶佢周圍走......Gary遇過兩次神蹟，大家都知以前佢煙不離手，每日食兩包煙，戒過3個月又打回原形，仲話戒煙聽唔到音樂，搵唔到食。後來佢陪我返教會聽到靠聖靈可以做到，當時佢決心好大，聽完之後佢就再無食煙。第二次神蹟係2019年1月8日，佢心臟衰竭，醫生話情況唔樂觀，於是我叫牧師嚟同佢傳福音，當時兄弟姊妹為佢祈禱，佢兩星期就可以出院繼續工作。」
接近兩個多小時的安息禮拜儀式完結前，到場的賓客逐一上前瞻仰遺容，然後太極成員及家人扶靈離開教堂，並乘車前往火葬場將靈柩火化。
（點擊放大睇圖片）
責任編輯：楊安莉