凍齡教主｜唐安麒53歲覓得真愛宣布訂婚 單親家庭成長19歲發迹創美容王國

有「凍齡教主」之稱的唐安麒（Angel）由80年代開始致力發展佢嘅美容事業，創立咗佢嘅美容王國超過30年，多年來一直予人女強人之感，鮮少提起自己嘅感情事。不過今日佢突然喺自己嘅社交平台宣布訂婚嘅消息，唔少佢嘅粉絲都留言送上祝福！

{{hket:inline-image name="163446661_10159009388602999_6540159486506542770_n.jpg"}}{{/hket:inline-image}}

現年52歲嘅Angel不時都會喺社文平台post一啲關於養生同減肥美容嘅帖文，又會不時分享心靈雞湯，獲封「凍齡教主」嘅佢儲落好多fans，人氣直逼唔少明星。今日佢罕有咁喺平台分享佢嘅私事，寫上：「我訂婚了，我與未婚夫都喜歡把戒指這樣戴，甚麼時候結婚，不會另行公布，現在只想與支持我的朋友，分享我們的喜悅。」相中佢同未婚夫手拖手，二人將戒指戴喺大拇指，非常溫馨。

帖文出咗未夠一日，即收到近千個留言祝福，Angel似乎好感恩遇上未婚夫，再甜蜜稱：「一輩子能遇見一個毫不保留對你的人，是一種福氣。在狂風暴雨時，他站在你的身前，為你遮風擋雨。在無人陪伴時，他總跟在你的身後，傾聽你的心聲。別人都關心你飛得高不高，只有他擔心你累不累。別人只要求你事事完美，只有他在意你的心情。不要弄丟一個對你好的人，不要辜負一顆真誠待你的心。」睇到都感覺到Angel未婚夫有幾錫佢！

Angel於單親家庭長大，曾住喺「1劏8」環境惡劣嘅劏房，10幾人共用廁廚。Angel發奮圖強，由16歲開始半工讀，做過美容學徒及健身教練，1987年更以19歲之齡與「細佬」創立美顏瘦身專門店，在業界打響名堂，縱橫美容界逾30年。曾出書、主持電視節目及參演舞台劇等，更孜孜不倦修讀自然療法、中藥營養學及體重控制學等。

Angel以自己嘅名譽同專業開展美容事業，佢指當年美容界良莠不齊，予人不正派感覺，所以決心做到有口皆碑，而佢嘅公司喺消委會亦不曾有投訴成功個案。Angel生意經歷過低潮期，曾經經歷過沙士、金融風暴，去年又再出現疫情，但她喺美容界尚算根基紮實，更曾創造「神話」出位吸客，成為一時佳話。

{{hket:inline-image name="dd2be787f8957161a575427c4e3f8024.jpg"}}{{/hket:inline-image}}

Angel當年亦曾成功「造星」，她表示：「我搵個唔吸引嘅人出嚟，我要將佢變靚變紅，呢個就係林志玲。」指當年林志玲的身形並不完美，吸引她的原因是夠平凡，故花了半年時間將林志玲變靚，最後成績有目共睹。