糾結10年丨李泳豪終走出「楊思琦陰霾」結新歡 未來新抱好賢淑鼎爺施明勁滿意

現年40歲嘅李泳豪同楊思琦於2002年合作拍攝劇集《血薦軒轅》撻着，相戀九年期間，男方受盡外界白眼，思琦更數度被雪藏，以為可以相依終老。不過2011年女方卻忽然分手斬情絲，單方面宣布與拍拖九年嘅李泳豪已分手數個月，有指思琦當時已珠胎暗結，搭上以為有米嘅吳帥。

{{hket:inline-image name="a6cd0c9765f5ff2fd683e25c34497bf0.jpg"}}{{/hket:inline-image}}

楊思琦發表單身宣言後先以短訊形式通知李泳豪，李泳豪仍癡心表示只要思琦妹返佢身邊，唔介意養埋冇血緣關係嘅bb，並願意迎娶思琦；不過思琦仍然係頭也不回咁狠撇豪仔，仲同李泳豪哥哥李泳漢一家隔空互數，鼎爺李家鼎仲嬲到幾度發火爆粗。

如今思琦已經係兩孩之母，兩個小朋友嘅生父都身分不明；而豪仔「一朝被蛇咬」，雖然一年後曾同洪天明舊愛中韓混血Miki交往過，但為怕再受傷火速斬攬，打後9年都一直「守dry」專注事業，唔係陪阿媽施明，就係陪大嫂湊仔買餸。阿媽施明上年都睇唔過眼，公開「呼籲」豪仔快啲結婚，話希望阿仔搵到個好錫佢嘅乖乖女。

（↓點擊放大睇圖片↓）

唔聲唔聲，原來幾個月前施明「許願」成功，豪仔終於再拍拖！據悉新歡Agnes同豪仔都係愛狗之人，Agnes仲會幫手湊姪仔，一齊行玩具店；賢良淑德之餘，仲對豪仔好細心，事事為佢着想，所以Agnes都非常「入屋」，成個李家都好歡喜佢！

鼎爺樂見阿仔終於都有拖拍，對Agnes亦幾滿意，大讚佢係「好女仔」，為人細心又尊重老人家，不過就話最緊要係阿仔滿意。鼎爺雖然忙，但都已經見過Agnes兩次，印象唔錯，坦言心急想飲呢杯新抱茶；而施明都好鍾意呢個未來新抱仔，阿爸阿媽都心急催婚，豪仔亦有意明年拉埋天窗！