多功能武指丨錢嘉樂不解溫柔到學懂製造驚喜 默默耕耘網民讚真「獅子山精神」

錢嘉樂與太太湯盈盈喺節目《超級無敵獎門人》中擦出愛火，兩人於2012年結婚，婚後誕下大女凱晴和幼女凱琪，一家四口經常於社交平台曬幸福，唔經唔覺，大女凱晴已經8歲，日前嘉樂喺佢IG post一家人同大女慶祝生日嘅合照，非常溫馨！

{{hket:inline-image name="XY79xu.jpg"}}{{/hket:inline-image}}

Kassidy出世時同爸爸十足餅印，不過愈大愈似媽咪；大女就爸爸媽媽都似，兩姊妹各有各可愛。嘉樂表示自囡囡出世後相當享受親子時間，感激盈盈持家有道，雖然四人行，都會抽空享受二人世界。「鐵漢」嘉樂仲因為太太改變咗唔少，佢話自己本身唔係有太多驚喜畀太太嘅男人，不過相處耐咗，太太教識佢細心，有時會提佢結婚周年紀念。依家嘅佢學識紀念日會畀驚喜對方，嘉樂發現間唔中都需要去做吓，婚姻生活就要互相氹對方，雖然老土，但就覺得幾得意又開心。

合照仲引發大家討論嘉樂個樣，唔少人都話佢睇落老咗好多有啲心痛，網民都大讚佢係顧家好男人，更對佢為香港電影作出嘅貢獻予以肯定！錢嘉樂1993年轉向電視界尋找出路，1996年獲曾志偉邀請代替陳小春在無綫電視《超級無敵獎門人》系列擔任「獎老」，及後多數以搞笑形象亮相。演出多部劇集，演技都相當唔錯，當中以《封神榜》嘅三眼仔楊戩最為突出。

2012年，錢嘉樂在《萬千星輝頒獎典禮2012》獲無綫電視頒發「傑出演員大獎」，肯定其於演藝圈中的貢獻及付出。同年憑《車手》與黃偉輝和吳海堂獲得台灣金馬獎「最佳動作設計」獎。2004年嘉樂拍攝《旺角黑夜》飛車特技場面時萌生推廣有關特技文化嘅念頭，於是羅致一群喜歡玩汽車飄移嘅青年參與飛車特技場口，漸漸地形成了現時嘅「錢家班」。

錢嘉樂有份參與嘅電影，單係由佢擔任動作指導嘅已經有58套，有份演出嘅仲多達125套，基本上近年有飛車特技嘅場口都係由「錢家班」包攬，網民更驚嘆2018年電影《黃金兄弟》嘅飛車場面好似荷里活電影咁出色，對香港電影界嘅貢獻無庸置疑。而且嘉樂一向予人謙厚之感，從來都冇話喺鏡頭前認叻，非常低調，大家都讚譽佢嘅默默耕耘，可以喺云云嘅武壇大哥大當中打出自己一片天地，係真正嘅「獅子山精神」咁話。