新城市廣場躍動悠園開班 齊齊keep fit

近期疫情放緩，係時候出去運動喇！公關姊妹同黛安報料，位於沙田新城市廣場嘅空中草地運動公園「躍動悠園」，今個月將開辦多個訓練班，仲有星級導師做指導，大家快啲報名，一齊趕走脂肪迎夏天啦。

躍動悠園將舉辦3類型課程，新地The Point會員憑指定積分及消費即可參加。其中兒童神射手訓練班，對象係7至12歲嘅小朋友，導師係甲一「籃神」蘇尚瀛，佢會親自落場傳授快狠準投球秘訣，同埋籃球基礎訓練。極速燒脂彈跳運動Kangoo Jumps近排大熱，到時專業認可健身及體重管理教練Andrew Dino，會教學員做彈跳舞步、健身動作，等大家可以快速燃燒卡路里。

壓軸介紹嘅徒手體能訓練班，難度至大。3位導師分別係世界街頭健身排名第23名嘅莫皓然、獲多項世界街頭健身排名嘅張顯廷，及前香港柔道代表黃楚恩。佢哋會傳授街頭健身基礎鍛練，同埋街頭健身招牌動作等秘笈。運動課程換領詳情可【按此】瀏覽。