赤柱廣場搞虛擬城市定向競賽 與愛犬齊做善事

好多養狗嘅朋友都鍾意帶埋毛孩周圍去玩，黛安收到風，膳動衡FOODSPORT同赤柱廣場一齊搞咗個「食物救援--城市定向挑戰賽」，可以同毛孩一齊玩之餘，仲可以一齊做善事。

因應疫情關係，今次競賽將以「虛擬定向」形式，喺3月29日至4月11日舉行。挑戰賽會以「星系」為主題，分個人、親子同毛孩組3個組別，參加者要用指定嘅手機應用程式，喺赤柱一帶搵出「能源方塊」去完成任務，幫手解決狗狗星系嘅缺糧問題。只要得到指定分數，就可以獲得獎牌。參加者喺挑戰賽消耗嘅卡路里，仲可以轉化為等量嘅食糧，為有需要嘅人士同流浪狗隻提供均衡食物㖭。

另外，赤柱廣場會喺4月3、4、10及11日舉辦狗狗海濱嘉年華，除咗有多個太空主題打卡位，仲有狗狗主題市集同工作坊，節目咁豐富，狗主同愛犬可以喺赤柱玩足一日。