淂記開運市集辦工作坊 體驗美食兼有嘢學

黛安放假都鍾意行下市集，公關姊妹話，高級中式餐飲品牌DUCKEE明日至周日（26至28日），將於銅鑼灣利園三期中嘅店舖舉辦「淂記開運市集」。市集會有一系列工作坊、攤位遊戲同美食體驗，包括每節$98嘅「雞尾酒工作坊」，喺30分鐘內由調酒師教大家調製雞尾酒，仲會送多套材料畀學員返屋企重溫調製呀！疫情下唔少人都會返屋企煮飯仔，場內亦有「小籠包工作坊」，有師傅授教製作小籠包，學成後可以喺屋企試下自己嘅手勢。

此外，姊妹話市集仲有好多得意嘅免費活動，例如有命理老師免費幫大家分析「面相及八字」；又有中醫把脈及附上食療食譜，黛安已約好姊妹們一齊去行。