中電拍電力知識動畫 教小孩珍惜用電

低碳生活人人都可以做得到，黛安知道，中電準備咗多套同節能有關嘅短片，教小朋友學以致用！例如佢哋首次製作合共4集嘅《中中學堂進階篇》和工作紙，透過動畫超人中中4人組嘅日常趣事，教小學生認識香港嘅發電能源組合、各種發電燃料嘅利弊，將發電過程動畫化，令艱深嘅電力知識變得有趣易明，等大家更加珍惜用電。

85間參與中電綠優校園認證計劃嘅小學，就會收到10個網上教學和活動範本，涵蓋能源耗用、節能、資源足印和生態保育，等老師可以配合常識科教學。

另外，因為疫情關係，中電工程師去唔到幼稚園探訪，就改為製作《探索電力之旅》短片，由工程師帶領小朋友由發電廠開始認識發電過程，仲可以睇埋工程師嘅日常工作同慳電節能知識㖭。