情人節好去處任你揀 反斗奇兵、櫻花步道、LED幕牆示愛

情人節就快到，各位諗好同愛侶去邊度慶祝未？黛安知道唔少商場都有主題活動，最啱拖友去拍拖！如果愛侶充滿童心，係迪士尼與彼思《反斗奇兵》、《玩轉腦朋友》系列粉絲，可帶佢去上水廣場嘅「『反』轉紅粉甜蜜玩具世界」。場內有一眾《反斗奇兵》人見人愛嘅角色，包括胡迪、翠絲、勞蘇等喺粉紅甜蜜國度現身，更送上心心、鑽石及桃花同大家影相，寓意愛侶全年甜蜜幸福、雙雙對對。

想影靚相，荃灣廣場就設有日系「粉紅櫻花步道」，傍晚時份仲會亮起燈飾，影到燦爛嘅夜景㖭。此外，廣場仲照顧埋鍾意消費嘅女士，喺場內任何商戶消費滿$4,000，即可獲2X獎賞，有機會獲得$300贈券同電影贈券2張㗎！

至於鍾意韓劇嘅愛侶，就不妨帶佢到尖沙咀中心及帝國中心，因為信和集團為S+REWARDS會員帶嚟總面積4,000平方米、由8.2萬顆變色LED燈組成嘅向海LED幕牆，只要喺S+REWARD App以150點數登記參加活動，被抽中嘅男士，就可以喺呢個LED幕牆霸氣咁向愛侶展示1分鐘嘅愛的宣言，超浪漫呀。