《貓‧美術館》延長開放 換上新年及情人節應景新裝

黛安係貓奴，之前同好姊妹去咗北角匯嘅《貓‧美術館》香港站打卡，聽講因為太受歡迎，原本1月10日就完結，喺徇眾要求下，決定延長至2月28日，仲換咗新裝㖭，貓奴可趁新春一齊去賞喵喇！

今次《貓‧美術館》香港站•新春祭，增設咗3大全新賣點，包括將打卡率極高嘅貓咪換上東洋賀年裝，同大家拜年。另外，今年情人節適逢年初三，「喵大街」亦會增添全新喵作，包括展示《阿諾菲尼貓夫妻的婚禮》和荷蘭畫家維喵爾嘅巨作《倒牛奶的貓》等，仲有雙雙對對嘅「戀戀喵燈」，啱晒去打卡放閃。

依家仲特別加推一系列全新《貓‧美術館》限量紀念品換領，包括香港站獨家「限量版喵作揮春」、必贏「喵作撲克牌」等，只要成為The Point by SHKP會員，就可憑指定積分和消費換領。此外，貓奴可將藏喺美術館4個唔同角落嘅QR喵Code搵出嚟，掃一掃就可獲得「躲喵喵」電子印章1枚，集齊4枚可免費獲贈限定禮品㗎。