舊日的足跡｜白彪自爆曾怒掟花樽險離婚收場 留羊咩鬚改運拎埋「最佳男配角」獎

74歲的白彪入行52年，在《香港愛情故事》中演活父權至上的貼地粗漢，獲TVB頒發「最佳男配角」。他日前接受電台節目《舊日的足跡》主持車淑梅訪問，分享得獎感受及剖白其「加拿大愛情故事」。

{{hket:inline-image name="123.jpeg"}}{{/hket:inline-image}}

白彪在90年代移民加拿大，他坦言當時差點離婚收場：「當時冇乜戲拍，心情麻麻，兩公婆嗌交嘅時候又會口不擇言，我同老婆講咗一句『咁多樣嘢你識乜吖！原來傷害咗佢，佢就記住喇！有一次我好衰，嗌到㷫起掟咗個花樽落道牆，仲掟穿咗個窿，為呢件事老婆要同我離婚，紙都差不多簽埋，好彩後來大家冷靜，老婆回心轉意......」

他續說：「嗰個窿三個月都冇人理，我第一件事親手去補番個窿，就補番埋段情！我梗係要做返啲嘢，即刻買香水同手袋啦！老實講，兩公婆一定有拗撬，只要體諒，各自退一步，最緊要唔好提離婚兩個字，一定好似 《香港愛情故事》咁樣大團圓結局！」

{{hket:inline-image name="1dd2a881-02c2-4afa-afc0-7bbceae55047_600.jpg"}}{{/hket:inline-image}}

白彪又指太太去年回來探孖孫，更大讚他的演技:「佢對我絕對信任，因為老婆知我而家飛都飛唔到啦！哈哈！大家都係講個信字，佢真係個好老婆，仲讚我啲戲好睇！」白彪又指疫情下一對龍鳳胎孫兒誕生，令他又驚又喜。因為一對孖孫在港不足月出世，他眼見就像兩堆麵粉仔，感到十分害怕。而且因疫情關係， 自己及家人均未能到醫院探望，只能靠護士上傳照片，實在擔心到不得了。幸好乖孫們現已學行，他才放下心頭大石。

（↓點擊圖片放大↓）

提起當年飾演第一代郭靖，白彪至今仍難忘曾被金庸公開稱讚：「佢對住我講，你真係啱哂做郭靖，你真係夠晒戇居呀！其實我都覺得自己似，因為資質唔係咁 smart，學嘢唔快，學十遍仲爭一招，仲有，我都好易俾人搵笨㗎！」

白彪又回味1995 年拍《神雕俠侶》的經歷：「當時拍住古天樂、李若彤，第三次做郭靖駕輕就熟，喺大陸非常紅，四處登台，越偏僻越紅，個個都好崇拜我。當年古天樂青靚白淨，成個白面書生咁，嘩！好好記性，好專業，演得好自然，武打同動作都OK，古仔行出來成個楊過咁。當年我睇佢眉目氣質，睇得出佢非池中物，佢演古惑仔、談情說愛、 喜劇樣樣掂......佢曬黑咗仲好，個人sharp咗，男人味出晒嚟，改咗膚色，唔知點解啲運即刻到！」

{{hket:inline-image name="56_600.jpg"}}{{/hket:inline-image}}

他又提到自己好信運： 「前三年冇乜工開，我照住塊鏡問自己，點解個樣咁㗎？試吓留啲羊咩鬚，之後真係即刻返嚟演《愛·回家之開心速遞》個雷公！仲有我對龍鳳胎孖孫都帶畀我好好運，帶挈爺爺攞咗個最佳男配角獎！我好 enjoy 做雷公，好霸道，一啲都唔似郭靖，對白唔使跟到足，同老拍檔大龍生羅樂林好有火花大鬥法，最難忘一場『楊過大戰郭靖』，過足戲癮。」

白彪又大讚兩位後輩:「我最欣賞大小姐林淑敏，佢做戲好流暢，每一個動作、每一個表情，我都好欣賞！而羅天宇性格戇戇直直又內向，外型都似郭靖，如為郭靖選角，佢嘅演繹方法都有八、九成似。」

（↓點擊圖片放大↓）

香港愛情故事│白彪日鬧夜鬧趕走老婆犯眾憎 「試過大男人講錯嘢搞到好大鑊」 【下一頁】