希慎減碳不出利市封 將資源用於慈善用途

唔少商場都會印製利市封派畀顧客，黛安收到風，希慎集團今年打破常規，首次唔生產實體利市封，反而將設計及生產嘅資源及費用，全數用嚟做慈善用途。公關姊妹話，呢次活動慳咗等同約384公斤嘅A4紙張，減少約1.84噸二氧化碳排放。慳到嘅費用會交由榕光社營運，例如「共建老人家」計劃，照顧缺乏社會支援嘅獨居或無依長者，等佢哋老有所依；而「魚菜共生」計劃，則鼓勵長者享受種植樂趣，保持心靈健康。

商場雖然唔送利市封，但仍然有靚靚嘅布置。例如希慎廣場「福運齊來風車廊」，逾千隻風車喜氣洋洋，寓意香港新一年轉出新機；利園一期則布下「牛運亨通金牛陣」，8隻金牛氣勢逼人，祝願大家來年牛轉乾坤。