人氣角色齊出動 現身6大商場迎新春

為咗迎接農曆新年嘅到來，今年多個商場都精心布置。黛安收到風，由今個月21日至2月28日，人氣插畫家Plastic Thing筆下嘅為食妹就會登陸荃灣廣場，喺5樓平台花園設置4大打卡位。大家可以由20米長「為食妹賀年日程表」出發，同為食妹鬥擺Pose，再轉動金幣滾輪、翻開大吉大利御守同拉出揮春，祈求牛年行好運！

置富Malls包括馬鞍山廣場、+WOO嘉湖、紅磡置富都會及沙田置富第一城，則與人氣角色Lulu The Piggy合作，帶嚟「置富Malls X罐頭豬LULU瀛春冧豬旅行豚」。肥嘟嘟嘅LULU豬將現身置富Malls嘅商場，希望大家新一年豬籠入水。

至於黃埔天地則帶嚟人氣卡通人物Din-Dong同日本卡通PostPet聯乘，喺今個月中將舉行「招財噹噹黃金『鞠』」，將手鞠設計融入中日式傳統美學，仲會喺黃埔號及聚寶坊打造新春布置㖭。