威威香港短片創作比賽 鼓勵青年勇敢追夢

疫情下，黛安同好多香港人一樣，希望有更多正能量。威威香港最近贊助香港基督教服務處兒童及青少年服務，舉辦「WAYWAY！埋位發夢青年短片創作比賽」，鼓勵大家勇敢追夢，透過唔同嘅故事為香港注入正能量。

黛安早幾日有幸參加頒獎禮，評審之一嘅導演兼編劇麥曦茵，分享自身探索個人生涯目標經驗時就話︰「堅持做心中認為係正確嘅事無比重要。夢想係一粒簡單『種子』，正如這次活動嘅宗旨係『敢發夢，實追到夢』。希望年輕人繼續勇於嘗試，保持熱誠，埋位發夢。」

聽公關姊妹講，活動反應熱烈，共有44支隊伍、超過130人報名。參賽者仲可以向專業導師學習編劇知識及短片創作，共有21條短片入圍，當中有8組別獲獎。獲得冠軍嘅係影片《討厭的人》，內容講述人與人之間羈絆嘅千絲萬縷關係，親情卻係抹不走嘅連繫。短劇充滿戲劇張力，喺平實生活展示家庭關係嘅重要性。黛安睇完咁多作品，覺得參加者都好用心製作，真係要再次恭喜各位得獎者先得。