新城市廣場 打造全港首個空中草地運動公園

疫情下大家更要注重健康，黛安收到風，沙田新城市廣場將商場1期5樓戶外平台，變身成為全港首個空中草地運動公園，明日（27日）就開幕喇！呢個運動公園佔地達3.5萬呎，有7大戶外Fitzone，包括逾5米高滑草梯、17米長懸吊式平衡木走道、攀石牆、無器械健身區、籃球場、草地緩跑徑、森系小山坡和秘道。

各個Fitzone都有唔同力量訓練課程，打頭陣嘅係12月推出嘅3大星級導師訓練班，特別請來各界頂尖運動員教練，包括由專業認可健身及體重管理教練Mr. Andrew Dino，執教風靡日韓女生極速燒脂彈跳運動「Kangoo Jumps跳住瘦」；仲有前香港柔道代表隊成員黃楚恩主理嘅「徒手體能訓練」等。The Point By SHKP會員或顧客，只要消費滿指定金額就可以報名參加喇。想知多啲課程詳情，就要留意官網或新地商場手機App最新公布。