飄雪水晶球＋「姆明谷」 利園區、黃埔天地浪漫迎聖誕

下個月就係聖誕節，黛安知道好多商場已安排連串慶祝活動，等大家盡早感受到節日氣氛同影靚相。其中利園區嘅布置將以香港迪士尼樂園15周年為主題，由12月上旬至明年1月10日，希慎廣場、利舞臺廣場同利園二期將遍布米奇、米妮同一眾迪士尼朋友嘅塑像及布置。黛安最期待嘅係睇5米高嘅「幻彩飄雪水晶球」，水晶球內有璃光幻彩嘅城堡，喺指定時間更有浪漫星光效果；仲有利舞臺廣場地下嘅閃爍聖誕樹，啱晒去影靚相。希慎廣場仲特設期間限定精品店，有多款限量禮品獨家發售。

而黃埔天地由即日起至明年1月3日，會化身成芬蘭森林嘅「姆明谷」，由姆明同一眾親友將北歐浪漫聖誕氣氛帶嚟香港。黃埔號船已經裝扮成5.5米高聖誕姆明屋，姆明同歌妮會喺附近甜蜜互動，姆明爸媽同樹精們就會喺小屋溫馨相聚，恍如置身北歐童話世界咁！黛安知道仲有個星光拱形隧道，內有金光閃閃嘅LED燈飾同樹枝交纏，可感受北歐式浪漫聖誕光影，去影相打卡真係一流呀！