海洋公園夜場派對 訪客組隊挑戰贏獎品

疫情下好多活動都受到影響，黛安都好想同朋友出去玩下。剛剛收到公關姊妹報料，原來海洋公園喺下個月頭兩個星期嘅星期五至星期日，舉辦夜間體驗「夜•玩•派」，大家可以約埋好友去海洋公園接受挑戰，贏取豐富獎品。

公關姊妹話，大家攞住海洋公園標準入場門票、智紛全年入場證或無限次入場證，毋須畀額外費用，就可以日夜玩盡公園每一個角落。參加者可以喺海洋列車高峰站旁嘅挑戰啟動站索取任務卡，組隊同老友闖入動感天地連番激鬥，包括坐上機動遊戲完成任務、化身偵探破解謎題，仲有喺「逃出熔岩陣」舞池大展舞技等。完成任務後就可憑分數換領獎品，包括SKECHERS運動鞋換領券及現金券等，真係好吸引！黛安都要約埋好友一齊去見識下先。