胡迪三眼仔勞蘇 東港城開嘉年華 齊齊玩兼打卡

迪士尼向來係大人細路嘅最愛，《反斗奇兵》更加係風靡全球動畫迷嘅經典！黛安知道，為慶祝《反斗奇兵》25周年，將軍澳東港城下個月起將舉行「反斗夢幻嘉年華」，一眾老友將首次同《怪獸公司》主角鬼馬登場，360度打造多個打卡位，畀你同胡迪、大眼仔、勞蘇selfie！

今次一眾角色將化身成唔同嘅藝術裝置，包括震撼嘅「7米高超巨型雙層旋轉玩具樂園」，抬頭即可欣賞到唔同角色嘅剪影裝飾，仲有個「反斗奇兵星光霓虹燈打卡房」，畀你同心愛角色喺星空中浪漫合照，絕對係粉絲朝聖必到！仲有全港首個「抱抱巨型毛茸茸勞蘇房」裝置，可以同毛茸茸嘅勞蘇作近距離接觸。

話明嘉年華，當然唔少得玩遊戲，場內特設2大主題遊戲，包括全港首個還原動畫中「三眼仔火箭」造型嘅巨型夾夾機，大考各位眼界及身手，夾出心愛公仔；仲有「翠絲牛仔帽大作戰」，用牛仔帽拋中指定目標，贏取豐富禮物。另仲設期間限定店同「小叉甜品屋」，一於約埋情人閨密齊齊嚟玩喇！