新地中秋送暖 贈基層食品防疫包

中秋節就快到，就算疫情下要保持社交距離，仍無阻人間有愛。黛安聽公關姊妹講，新鴻基地產發展有限公司好有心，最近透過「以心建家送暖行動」嘅疫境支援項目，向基層家庭同長者送上應節食品同防疫物資，共有12,000人受惠。

之前新地派出「新地義工Team力量」義工隊，同明愛筲箕灣綜合家庭服務中心、香港家庭福利會北角綜合家庭服務中心同香港聖公會麥理浩夫人中心合作，分別向港島東區同葵青區嘅基層家庭派發禮物包，內有月餅、文具包同搓手液等物品。另外，又透過「白田邨重建——友情人鄰里計劃」，向深水埗區內長者派發應節食品同防疫禮物包，令受惠長者好感動。